Շինուհայրը տարիներ առաջ եղել է Սյունիքի մարզի ամենազարգացած համայնքներից մեկը՝ ի շնորհիվ գյուղի կոշիկի գործարանի, որտեղ աշխատել են ավելի քան 800 տեղացի և հարակից համայնքների բնակիչներ: Խորհրդային Միության փլուզումից հետո գործարանը փակվել է, որի արդյունքում մեծ թվով համայնքի բնակիչներ արտագաղթել են Ռուսաստանի Դաշնություն: Շինուհայրը և հարակից համայնքները հիմնականում գոյատևում են գյուղատնտեսության հիման վրա: Առավել տարածված է ոչխարաբուծությունը, սակայն բրդի հիմնական մասը, չունենալով սպառման շուկաներ, դիտարկվում է որպես թափոն:

Կանանց Զարգացման «Ռեսուրս կենտրոն»    հիմնադրամի նախաձեռնությամբ 2014թ –ին Շինուհայր համայքնում ստեղծվել է «Բրդից կարպետ» սոցիալական ձեռնարկատիրությունը, որի  նպատակն է ստեղծել աշխատատեղեր սոցիալապես անապահով կանանց համար, դրանով իսկ նպաստել տնտեսության զարգացմանը: Այս նախաձեռնության միջոցով թափոն համարվող բուրդը վերամշակվում է` դառնալով շուկայական պահանջարկին համապատասխան արտադրանք: «Բրդից կարպետ» արտադրամասում աշխատում են Շինուհայր համայնքի 15  կանայք: Արտադրամասը ունի 4 հիմնական ուղղություն` բրդի վերամշակում, թելերի մանում, կարպետագործություն և հուշանվերների վաճառք: Բրդյա թելը 100% բնական հումքից է, էկոլոգիապես մաքուր, առանց քիմիական հավելումների: Արհեստանոցում վերականգնվում են հին ավանդական զարդանախշերը, պատրաստվում են ինչպես ավանդական, այնպես էլ ժամանակակից դիզայնով կարպետներ և հուշանվերներ