«ՎԻՆՆԵԹ Հայաստան» կանանց ռեսուրս կենտրոնների ցանցի անդամ «ՎԻՆՆԵԹ Վանաձոր» կանանց և երիտասարդների զարգացման ՀԿ-ն իր գործունեությունը սկսել է 2016 թվականին՝ որպես կանանց նախաձեռնող խումբ։ 2016թ․ հոկտեմբերին նախաձեռնող խումբը ներգրավվել է «Կանանց քաղաքական ակտիվության աջակցություն` տեղական մակարդակում» եռամսյա ցանցային ծրագրում, որի նպատակն էր Հայաստանի 10 քաղաքներում ՏԻՄ-երին կից ստեղծել կանանց ակտիվ խմբեր, աջակցել նրանց հասարակական-քաղաքական ակտիվությանը:

2020 թվականի հուլիսին ՄԱԿ-ի Բնակչության հիմնադրամի  աջակցությամբ՝ «Ապագան այսօր. կանանց, երիտասարդների և երեխաների հզորացում հանուն Հայաստանում ժողովրդավարության ամրապնդման» ծրագրի շրջանակներում, նախաձեռնող խումբը գրանցվել է որպես «ՎԻՆՆԵԹ Վանաձոր» կանանց և երիտասարդների զարգացման հասարակական կազմակերպություն (ՀԿ)։

«Ապագան այսօր» ծրագրի շրջանակներում «ՎԻՆՆԵԹ Վանաձոր» ՀԿ-ն իր մշտական հասցեն ունի  Լոռու մարզի Վանաձոր քաղաքում՝ կահավորված  և հագեցված համապատասխան անհրաժեշտ տեխնիկական միջոցներով։

Մենք այսօր

«ՎԻՆՆԵԹ Վանաձոր» կանանց և երիտասարդների զարգացման ՀԿ-ն, իր ծրագրերի միջոցով, նպաստում է Լոռու մարզի կանանց և երիտասարդների հզորացմանը, աշխատանք փնտրող և խոցելի խմբերի համար նոր կայուն աշխատատեղերի ստեղծմանը,  այդպիսով՝ զարգացնելով և աջակցելով առաջնորդությանը, նորարարությանը,  ձեռներեցությանը, ինչպես նաև խթանելով սոցիալական ներգրավվածությունը:

Ընթացքի մեջ է Քեյր Կովկասի, «ՎԻՆՆԵԹ Հայաստան» կանանց ռեսուրս կենտրոնների ցանցի և այլ տեղական ու ռեգիոնալ գործընկերների հետ համատեղ Հարավային Կովկասում իրականացվող «Կնոջ ուժը, նրա ապագան» եռամյա տարածաշրջանային ծրագիրը: «ՎԻՆՆԵԹ Վանաձոր»-ը հանդիսանում է ծրագրի գործընկեր կողմ Լոռու մարզում։

Կազմակերպությունն ունի 6 անդամ, 20 կամավոր և 90 հոգուց կազմված երիտասարդական ակտիվ խումբ, որը կամավոր սկզբունքով իրականացնում է տարբեր միջոցառումներ և նախաձեռնություններ։