Հայաստանի հասարակական և տնտեսական կյանքում կանանց սահմանափակ մասնակցության խնդիրը լուծելու համար 2007թ.-ին ԵԱՀԿ երևանյան գրասենյակը սկսեց ծրագիր, որի նպատակն էր աջակցել տեղական մակարդակում կանանց հզորացմանը: Ընտրվեց հարավային մարզը` Սյունիքը, որը շատ հեռու է մայրաքաղաքից և որտեղ կանայք կազմում էին բնակչության մեծամասնությունը, բայց ՏԻՄ-երում ներգրավված չէին և աշխատանքի տեղավորման հնարավորությունների առումով տղամարդկանց համեմատ կանանց իրավիճակն անբարենպաստ էր:

2008թ.-ին հիմնադրվեց Սյունիքի առաջին ռեսուրս կենտրոնը ամենահարավային քաղաքում` Մեղրիում՝ տեղացի 9 կանանց նախաձեռնությամբ:

« Հասարակական կազմակերպությունների բացակայությունը Մեղրիի տարածաշրջանում պարտավորեցնող էր մեզ համար. սակայն տարիների աշխատանքի արդյունքում այսօր էլ տեղացիներից շատերը «հասարակական կազմակերպություն» արտահայտությունը նույնականացնում են «Մեղրու կանանց ռեսուրս կենտրոն» -ի հետ»:

Մենք այսօր

Իրականացված 27 ծրագիր, ՏԻՄ-երի հետ համագործակցությամբ` 31 համայնքային նախաձեռնություններ: Կարպետի և կար ու ձևի դասընթացներին մասնակցած 30 կանանց համար՝ ստացած հմտությունները դարձել են կայուն եկամտի աղբյուր: 100-ից ավելի կանայք պահպանել են իրենց աշխատատեղերը` ստանալով գիտելիքներ, իսկ 15-ը սեփական բիզնեսն են սկսել:

«Ստեղծել և գործարկում ենք Meghrinews լրատվական կայքը, «ՀամՏես» թեյարան-ստուդիա սոցիալական ձեռնարկությունը, շարունակում ենք աշխատել ուսուցանված շահառուների հետ և աջակցում ենք նրանց կողմից ստեղծված արտադրանքի իրացմանը: Պրոֆեսիոնալ նկարահանումներով և նյութերով ներկայացնում ենք մեր ծրագրերը, շահառուներին և համայնքը, համագործակցում ենք տարբեր հեռուստաընկերությունների և լրատվամիջոցների հետ:

Կազմակերպության գրասենյակի և սոցիալական ձեռնարկության տարածքները, ավագանու որոշմամբ, ՏԻՄ-ի կողմից անհատույց տրամադրվել են ՀԿ-ին, որոնք վերանորոգվել են մեր կողմից` օգտագործելով ֆոնդհայթայթման մեր հմտությունները»: