Հիմնադրվելով 2009 թվականին՝ շվեդական կանանց ռեսուրս կենտրոնների լավագույն փորձի կիրառմամբ, ՎԻՆՆԵԹ Գորիս զարգացման հիմնադրամը (Նախկինում՝ Կանանց զարգացման «Ռեսուրս կենտրոն» հիմնադրամ)՝ Կապանում և Մեղրիում գործընկեր կանանց ռեսուրս կենտրոնների (ԿՌԿ) հետ համատեղ, դարձել է Սյունիքի մարզի տեղական և տարածաշրջանային կայուն զարգացման գործում կանանց ներգրավման հիմնական դերակատար:

«ՎԻՆՆԵԹ Գորիս»-ը, թիմի հանձնառության ու կարողությունների շնորհիվ, 2014թ.-ին ստանձնել է «ՎԻՆՆԵԹ Հայաստան» կանանց ռեսուրս կենտրոնների ցանցի գլխավորումը և անդամակցությունը՝ Կանանց ռեսուրս կենտրոնների եվրոպական ասոցիացիային (“WINNET Europe”), որպես առաջին և դեռևս միակ ոչ ԵՄ երկիր ներկայացնող անդամ:

Հիմնադրամը՝ նպաստում է Հայաստանում կանանց հզորացմանը, և կառուցում իր գործունեությունը փոխկապակցված և նպատակային գործողությունների ու ծրագրերի միջոցով՝ հետևյալ երեք հիմնասյուների շուրջ՝ կանանց քաղաքական ներգրավվածություն, տնտեսական հզորացում,սոցիալական ակտիվություն և աջակցություն։

Մենք այսօր

«ՎԻՆՆԵԹ Գորիս» հիմնադրամը, իր ծրագրերի միջոցով, նպաստում է Սյունիքի և Հայաստանի այլ մարզերի կանանց և երիտասարդների հզորացմանը, աշխատանք փնտրող և խոցելի խմբերի համար նոր կայուն աշխատատեղերի ստեղծմանը, այդպիսով՝ զարգացնելով և աջակցելով առաջնորդությանը, նորարարությանը,  ձեռներեցությանը, ինչպես նաև խթանելով սոցիալական ներգրավվածությունը:

Կանանց տնտեսական հզորացումը՝ որպես նրանց տնտեսական անկախության առաջխաղացման և բռնության կանխարգելման կարևոր գործիք, եղել և մնում է հիմնադրամի գործունեության առանցքային նպատակ՝ 2009թ.-ին հիմնադրումից ի վեր: Այս ընթացքում «ՎԻՆՆԵԹ Գորիսն»-ին օգնել է ավելի քան 200 գյուղաբնակ կին արհեստավորների և ձեռներեցների, ներգրավվել հիմնադրամի արհեստագործական ակումբներում՝ այս հիմքի վրա 2015-ին ստեղծելով իր առաջին սոցիալական ձեռնարկությունը:

Հիմնադրամի՝ այսօր արդեն բավական ճանաչված «Գորիս Հենդմեյդ» սոցիալական ձեռնարկությունը, կայուն եկամտի հնարավորություններ է ստեղծում տարածաշրջանի շուրջ 40 անապահով կանանց համար և խթանում է տնտեսական զարգացումը՝ ձեռարվեստի և բրդի արժեշղթայի զարգացման միջոցով: